Bīdreiba “LgSC” eistynoj projektu kapacitatis styprynuošonai
Nu 2021. goda 1. maja da 2022. goda 30. apreļa bīdreiba “LgSC” eistynoj projektu “Bīdreibys “LgSC” kapacitatis styprynuošona pylsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā”.
Projekts sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs Islande, Lihtenšteina i Norvegeja. Vaira par Aktivūs īdzeivuotuoju fondu ite: https://www.activecitizensfund.lv
Sajimtais atbolsts: 19 994,87 €, projekta numers AIF/2021/IK/201
Projekta mierkis ir styprynuot bīdreibys “LgSC” kai patstuoveigys, aktivys, ilgtspiejeigys i sabīdreibā pozitivys puormainis nasūšys organizacejis kapacitati.
Projekta mierki paradzāts sasnēgt, eistynojūt itaidys aktivitatis:
1. Bīdreibys kūpeibys i vadeibys prasmu styprynuošona.
Ar četru mienešu apvuiceibu i koučinga programu, kura īsaisteiti bīdreibys bīdri i aktivisti. Paradzāts, ka sekmeiga aktivitatis eistynuošona paleidzēs stabilizēt bīdreibys dorbu, styprynuos bīdreibys komandys goru, veicynuos lobuoku vadeibu i tai varēs lobuok eistynuot izvierzeitūs mierķus. Lobuoka komandys sadarbeibys iz prīšku ļaus dasaisteit bīdreibai ari jaunus bīdrus. Tai kai “LgSC” bīdri, dzeivojūt dažaiduos Latgolys i Latvejis vītuos, ir aktivi ari vītejūs kūpīnu dalinīki, dabuotū pīredzi jū varātu izmontuot ari vītejūs regiona aktivitašu i pylsūniskuos īsaistis styprynuošonā.
2. Bīdreibys atteisteibys reiceibys plana i strategejis atjaunuošonys izstruode
Leidz ar bīdreibys puormaiņom kai nūsaukumā, tai bīdru interesēs orgranizacejis atteisteibai i stabilizacejai byutu vajadzeiga profesionala podturiešona. Leidza ar apvuiceibom, kuruos izvērtētu bīdreibys mierķus, vierteibys, vizeju i aizdavumus, aktivitate iz prīšku paleidzātu bīdreibys stabilizacejai i atteisteibai, mierķu sasnēgšonai, veicynuotu stypruoku i aktivuoku pylsūniskū sabīdreibu, kai ari leidza ar stypruoku bīdreibu i jo eipaši veicynuotu Latgolys regiona īdzeivuotuoju leluoku īsaisti sovu interešu puorstuoveibā.
3. Bīdreibys zeimyna atjaunuošona i vizualuos strategejis sataiseišona
Leidza ar īprīšk sauktajom puormaiņom i tū, ka ituo breiža bīdreibys logo taiseits gondreiž pyrma 10 godu, zeimyna izveiduošona byutu vēļ vīns sūļs bīdreibys atpazeistameibai. Aktivitate paleidzēs sataiseit jaunu i stypru bīdreibys vizualū i saturyskū zeimynu, kas veicynuos bīdreibys atpazeistameibu, nūstyprynuos uzticeibu sabīdreibā i veicynuos atbolsta pīsaisti. Zeimyna tapšonā dabuotī marketinga materiali paleidzēs bīdreibys komunikacejā iz prīšku, planavuots, ka tū varēs izmontuot vysmoz vēļ septeņus godus.
4. Bībreibys zīduojumu dasaisteišonys kampaņa
Da ituo “LgSC” aktivi sovom aktivitatem dasaistiejuse dažaidu projektu finansiejumu, nu tys ari nūsoka, kai teik eistynuoti bīdreibys mierki – tys atkareigs nu projektu konkursu. Kab stabilizātu bīdreibys dorbu i dasaisteitu nu projektu naatkareigu finansiejumu, planavuota zīduojumu pīsaistis kampaņa. Sekmeiga tuos eistynuošona ļaus bīdreibai pareizi pozicionēt i atteisteit zīduojumu dasaisteišonu i mazynuotu bīdreibys i leidza ar tū “LgSC” dorbu atkareibu nu projektu finansiejuma.
5. Bīdreibys saimnīcyskuos darbeibys resursu īspieju apzynuošona i atteisteišona
Leidzeigi kai īprīšk sauktuo aktivitate, ari sovu resursu apzynuošona ļaus samazynuot atkareibu nu dažaidu projektu finansiejuma i stabilizēt dažaidu aktivitašu dareišonu. Dabuotūs leidzekļus kai nu zīduojumu dasaistis, tai saimnīcyskuos darbeibys (izdūtūs gruomotu tierdznīceiba, folklorys kūpys programys, latgalīšu rokstu volūdys konsultacejis i cyti pakolpuojumi) “LgSC” īguļdeis dorbus i mierku sasniegšonā.
6. Bīdreibys publicitatis i komunikacejis plana eistynuošona
Leidza ar bīdreibys kapacitatis ceļšonu i jau aizsuoktajom ci gaidomajom puormaiņom, bīdreibys aktiviziešonu, mierķu sasniegšonā vajadzeigs precizs i efektivs komunikacejis plans. Projektā planavuots dasaisteit komunikacejis i marketinga vadeituoju, kas ar sovom prasmem i zynuošonom ļaus eistynuot skaidru i vierzeitu bīdreibys komunikaceju – bīdru i sabīdreibys regularu informiešonu par bīdreibys aktivitatem, darbeibu, mierkim i īspieju īsasaisteit.
7. Īsasaisteišona NVO sektora organizacejuos
Da ituo bīdreiba “LgSC” vaira koncentriejusēs iz sovu izvierzeitūs mierķu sasniegšonu, nu, pīaugūt bīdreibys kapacitatei, byutu vajadzeiga ari leluoka īsasaisteišona kūpejā NVO sektora procesu vierzeibā. Ar itū aktivitati paradzāts paplašynuot bīdreibys zynuošonys, redzislūku i informaceju par NVO sekotra darbeibu Latvejā.
8. Bīdreibys pīredzis i zynuošonu papyldynuošona ar Norvegejis organizaceju darbeibys pīmāru
Pasateicūs storptautyskūs projektu sadarbeibai pādejūs treis godūs, “LgSC” bejuse īspieja izzynuot mozuok lītuotūs voi regionalūs volūdu situaceju cytuos pasauļa vaļstīs (Pūlejā, Meksikā, Italejā, Igaunejā, Niderlandē i cytur), tai reizē, styprynojūt kapacitati i zynuošonys regiona interešu puorstuoveibā. Itymā projekta aktivitatē planavuots izzynuot ari regionu īdzeivuotuoju volūdys i dzeivis situaceju Norvegejā. Dabuotuos informaceja iz prīšku var paleidzēt ari bīdreibys mierku sasnēgšonai – car cytu vaļstu pīredzi saprast, kai lobuok i efektivuok struoduot Latgolys regionā i Latvejā kai taidā.
